«ПАВЛОДАРЭНЕРГО» АҚ 2026 жылы инвестициялық бағдарламаға 4,6 млрд теңге жоспарлаған. Инвестициялық бағдарламаны қаржыландыру көзі компанияның меншікті қаражаты болып табылады. Монополияға қарсы комитет департаментінің өкілдері, журналистер мен қоғамдық ұйымдардың өкілдері Павлодар 3-ЖЭО және күл үйінділеріне барып, инвестициялық бағдарламаны іске асыру объектілерімен танысты.
Биыл «ПАВЛОДАРЭНЕРГО»АҚ 2-ЖЭО үшін күл үйіндісі 3-ші кезегі 2-ші іске қосу кешенінің құрылысы бойынша ауқымды жұмыстар жүргізуде.
Павлодар ЖЭО-лары Екібастұз көмірімен жұмыс істейді, оны жағу барысында күл мен қож көп түзіледі. Күл үйіндісі - өндіріс қалдықтарын орналастыруға арналған арнайы жабдықталған құрылым. ЖЭО үшін бұл аса маңызды элемент әрі станцияның экологиялық қауіпсіздігінің кепілі. Көмірді жағу нәтижесінде пайда болған қож арналарға түсіп, онда оны айналымдағы су іліп әкетеді. Бұл қоспа күл қойыртпағы деп аталады; қуатты сорғылар күл қойыртпағын ұзын құбырлар (күл құбырлары) арқылы тікелей күл үйіндісіне айдайды; күл мен қождың қатты бөлшектері түбіне шөгеді, ал тұндырылған (тазартылған) су станцияға оралады. Тұндырылған су күлді тасымалдау үшін ғана емес, сонымен қатар жабдықты салқындату үшін де қажет. Оның ең маңызды міндеті - күлтұтқыш қондырғыларды суландыру, мұнда түтін газдары атмосфераға шығарылмас бұрын соңғы рет тазартылады.
Егер қолданыстағы күл үйіндісінің сыйымдылығы шегіне жетіп, ал жаңа күл үйіндісі дайын болмаса, станция қалдықтарды кәдеге жарата алмай, амалсыздан жұмысын тоқтатуға мәжбүр болады. Жаңа кезектер мен іске қосу кешендерін пайдалануға беру Павлодардың тұрғын үйлері мен өнеркәсіптік кәсіпорындарын алдағы жылдар бойы электр энергиясы және жылумен үздіксіз қамтамасыз етуге кепілдік береді.
Сонымен қатар, энергетиктер Павлодар 3-ЖЭО-да үш қазандық агрегатын және Павлодар 2-ЖЭО-да екі қазандық агрегатын қайта құрылымдауды іске асыруда.
Инвестициялық бағдарлама аясында қызметкерлер қазандық агрегаттарының құйындағыштары мен эмульгаторларының тамшытұтқыларын ауыстырды. Бұл қазандықтың жұмысы үшін аса маңызды, өйткені жабдықтың ұзақ қызмет ету мерзімі мен түтін газдарын тазарту тиімділігі осы тораптардың жағдайына тікелей байланысты. Құйындағыштар мен тамшытұтқылар күлді ұстау ПӘК-ін арттырып, түтін сорғыштар мен жабдықтарды тозудан қорғайды.
Жаңартылған эмульгаторлар Павлодар атмосферасына шығарылатын шаң (күл) шығарындылары бойынша қатаң экологиялық нормативтердің сақталуын қамтамасыз етеді. Жаңа элементтер эмульгаторлардың шөгінділермен бітелу қаупін жойып, қысқы жылыту кезеңінде қазандық агрегаттарының тұрақты тартымын және толық жылу қуатын қамтамасыз етеді.
